قصة سيدنا نوح الجزء الاول (١)
 |
| قصة سيدنا نوح |
كان يا ما كان وما يحلى الكلام الا بذكر النبي؟
عليه الصلاة والسلام
بعد لما سيدنا إدريس مات فضل الناس بعده بيعبدوا ربنا بس..❤
وكلهم مؤمنين بربنا ،، ممكن يعملوا ذنوب بس ليرجعوا يستغفروا ربنا وكلهم عارفين إنهم بيعبدوا ربنا بس و ماحدش كان بيعبد غير ربنا
طب إيه اللي حصل ؟
كان فيه كام واحد كدة وسط الناس كانوا صالحين وطيبين جدا..
اسمهم أية ؟؟
اسمهم ود ،،، و سواع ،،، و يغوث ،،،، و يعوق ،، و نسرا...
كانوا بيعلموا الناس الخير وعبادة ربنا..❤
ولهم مكان بيقعدوا فيه يعلموا الناس عبادة ربنا ويعلموهم الاعمال الطيبة..
والناس بيحبوهم جدا..❤
فلما الصالحين دول كبروا وماتوا ،، الناس حزنت اوي حزن شديد
وقالوا احنا مش عاوزين ننسي الناس الصالحين دول... مش عاوزين ننسي (ود وسواع ويغوث ويعوق ونسرا...)
فالشيطان جابلهم فكرة ايه هي ؟
انهم يعملوا لكل واحد تمثال.
الناس قالوا دي فكرة حلوة اوي ،، احنا هنبني تماثيل للصالحين الطيبين دول عشان مش عاوزين ننساهم..
وفعلا بنوا لكل واحد صالح تمثال في المكان اللي بيقعد فيه.. وبقوا يحترموا التماثيل دي فعلا ويفتكروا انهم لما يحبوا يحترموا التماثيل دي ربنا كده هيحبهم..!
لكن عدي وقت..
ناس ماتت وناس أتولدت وبدأت الناس تنسي قصة التماثيل الحقيقية وتقول :
التماثيل دي مش تماثيل عادية.. دي تماثيل اجدادنا كانوا بيعبدوها ،، ولما يبقوا عاوزين الدنيا تمطر وتروي زرعهم يروحوا يطلبوا من التماثيل دي ..
واتحولت التماثيل لاصنام وكل واحد عمل تمثال صغير عشان ياخدوا معاه بيته..
وفعلا بدأ الناس يعبدوا الاصنام دي ويقولوا احنا أجدادنا عبدت التماثيل دي واحنا هنعمل زيهم وسابوا عبادة ربنا.
وبقوا فاكرين ان ود وسواع ويغوث ويعوق ونسرا آلهة !
لغاية لما ربنا اختار ميييين ..؟
سيدنا نوح عليه السلام انه يكون الرسول اللي هيحذرهم..
سيدنا نوح راح لقومه اللي بيعبدوا الاصنام عشان يعرفهم ان اللي بيعملوه ده مش صح وقالهم :
يا قومي اعبدوا الله وحده..❤
مافيش غير ربنا بس اللي المفروض تعبدوه وتطيعوه.
" لَقَدْ أَرْسَلْنَا نُوحًا إِلَى قَوْمِهِ فَقَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
سيدنا نوح عرفهم انهم لازم يسيبوا الاصنام دي ويستغفروا ربنا..
وقالهم لو عبدتم ربنا واستغفرتم ربنا هتلاقوا خير من كل مكان ❤وهينزل عليكم أمطار من السماء ❤ ويرزقكم اموال واولاد❤ ويجعل لكم حدائق جميلة وأنهار ويدخلكم الجنة في الاخرة كمان.❤
بس استغفروه من ذنوبكم واعبدوه وحده..❤
فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا "
يُرْسِلِ السَّمَاءَ عَلَيْكُمْ مِدْرَارًا *
وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا"
طب وقوم نوح سمعوا كلامه ؟.
لاااااااااء.
الكفار اللي بيعبدوا الاصنام ردوا عليه :
" إِنَّا لَنَرَاكَ فِي ضَلَالٍ مُبِينٍ"
يعني احنا شايفين انك ضال ،، يعني بعدت خالص عن الصح!
فسيدنا نوح قالهم :
قَالَ يَا قَوْمِ لَيْسَ بِي ضَلاَلَةٌ وَلَكِنِّي رَسُولٌ مِّن رَّبِّ الْعَالَمِينَ أُبَلِّغُكُمْ رِسَالاَتِ رَبِّي وَأَنصَحُ لَكُمْ وَأَعْلَمُ مِنَ اللّهِ مَا لاَ تَعْلَمُونَ
يعني انا رسول وببلغكم رسالات من ربنا وربنا خلاني أعلم أشياء انتم ماتعرفوهاش.
فردوا عليه بتكبر أوي وقالوا:
انت بشر زينا زيك ومش رسول..
وحنا عارفين انك بتقول انك رسول عشان تبقي احسن مننا ؟؟
لاااااا مش هتبقي احسن مننا واشمعنا ربنا اختارك انت ؟.
وربنا لو هيبعتلنا حد هيبعتلنا ملاك!! احنا ماسمعناش عن الكلام ده قبل كده في اجدادنا!
"فَقَالَ الْمَلَأُ الَّذِينَ كَفَرُوا مِنْ قَوْمِهِ مَا هَذَا إِلَّا بَشَرٌ مِثْلُكُمْ يُرِيدُ أَنْ يَتَفَضَّلَ عَلَيْكُمْ"
"وَلَوْ شَاءَ اللَّهُ لَأَنْزَلَ مَلَائِكَةً مَا سَمِعْنَا بِهَذَا فِي آبَائِنَا الْأَوَّلِينَ
سيدنا نوح رد عليهم وقالهم :
أنتم ليه مستغربين ان ربنا يبعت لكم رسول إنسان عشان يحذركم وينصحكم ؟
"أَوَعَجِبْتُمْ أَنْ جَاءَكُمْ ذِكْرٌ مِنْ رَبِّكُمْ عَلَى رَجُلٍ مِنْكُمْ لِيُنْذِرَكُمْ وَلِتَتَّقُوا وَلَعَلَّكُمْ تُرْحَمُونَ "
مافيش حد آمن غير عدد قليل اوي..
ومعظمهم ناس ضعيفة ومسكينة وبيشتغلوا أعمال بسيطة. لكن الاغنيا والأقويا مش راضيين يؤمنوا بربنا ..
الاغنياء والاقوياء لما بصوا علي سيدنا نوح..
لقوا ان الناس المؤمنة اللي معاه هما الضعفاء فحسوا بالتكبر انهم يبقوا مع الناس الضعيفة دي..
وقالو لسيدنا نوح :
"وَمَا نَرَاكَ اتَّبَعَكَ إِلَّا الَّذِينَ هُمْ أَرَاذِلُنَا بَادِيَ الرَّأْيِ ".
يعني اللي اتبعك وسمع كلامك أقل ناس فينا.. إزاي نبقي معاكم ؟
هما مافكروش في كلام سيدنا ا نوح وانه الصح..
هما تكبروا انهم يبقوا مع الضعفاء ويؤمنوا زيهم..!
وقالوا كمان :
"وَمَا نَرَى لَكُمْ عَلَيْنَا مِنْ فَضْلٍ بَلْ نَظُنُّكُمْ كَاذِبِين"
يعني مش شايفين انكم لما آمنتم بقيتم احسن مننا ولا شايفين انكم لما آمنتم بقي معاكم حاجة اكتر مننا أنتم كذابين..
سيدنا نوح قالهم..
انا ما قولتش اني عندي خزائن السموات والارض ولا قلت اني عارف الغيب واللي هيحصل ولا قلت اني ملك من عند ربنا..
انا بشر ربنا بعتني ليكم عشان احذركم..
وَلَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ إِنِّي مَلَكٌ
قوم نوح مصممين علي انهم هما الصح ومتكبرين يسمعوا كلام من سيدنا نوح.
فسيدنا نوح قالهم :
انا ربنا اظهرلي الحق وانتم كأنكم متغمي عينكم عن الحق. مش هقدر ألزمكم بحاجة انتم مصممين انكم تعموا عينكم وماتشوفوهاش..
وانا مش بطلب منكم مقابل ولا فلوس ربنا اللي هيعطيني الثواب
انا مش عاوز غير انكم تشوفوا الحق.
"قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي رَحْمَةً مِنْ عِنْدِهِ فَعُمِّيَتْ عَلَيْكُمْ أَنُلْزِمُكُمُوهَا وَأَنْتُمْ لَهَا كَارِهُونَ"
"وَيَا قَوْمِ لَا أَسْأَلُكُمْ عَلَيْهِ مَالًا إِنْ أَجْرِيَ إِلَّا عَلَى اللَّهِ"
فقوم نوح ردوا : طب انت ازاي عاوزنا نؤمن واللي اتبعك الضعفاء والمساكين اطردهم ،، واحنا ممكن نقعد ونسمع منك!!
"قَالُوا أَنُؤْمِنُ لَكَ وَاتَّبَعَكَ الْأَرْذَلُونَ "
هما مش عاوزين يبقوا علي الحق عشان بيبصوا باءحتقار للناس اللي علي الحق..
لقوهم ناس مساكين ولبسهم بسيط وشكلهم غلبان..
فقالوا ايه ده! احنا نبقي مع دول! ونؤمن باللي هما آمنوا بيه ؟! لا... لا لا
قوم نوح صمموا انه يطرد المؤمنين..
لانهم اقل منهم وبيشتغلوا اعمال بسيطة ومش اغنياء زيهم
فسيدنا نوح عليه السلام قال لهم:
انا مليش دعوة الضعفاء دول كانوا بيعملوا ايه مادام قلوبهم مؤمنة وطيبة وانا ما أقدرش أطردهم ابدأ ..
ليه ميقدرش يطردهم ؟؟
لأنه بيخاف من عقاب ربنا
"قَالَ وَمَا عِلْمِي بِمَا كَانُوا يَعْمَلُونَ"
" وَيَا قَوْمِ مَنْ يَنْصُرُنِي مِنَ اللَّهِ إِنْ طَرَدْتُهُمْ أَفَلَا تَذَكَّرُونَ"
هو سيدنا نوح فضل يدعو قومه كام سنة ؟
950 سنة
"وَلَقَدْ أَرْسَلْنَا نُوحًا إِلَىٰ قَوْمِهِ فَلَبِثَ فِيهِ هِمْ أَلْفَ سَنَةٍ إِلَّا خَمْسِينَ عَامًا "
سيدنا نوح نصحهم بكل الطرق..
الصبح وبليل.
"قَالَ رَبِّ إِنِّي دَعَوْتُ قَوْمِي لَيْلًا وَنَهَارًا "
ويروح يكلمهم مع بعض ويقول لكل واحد لوحده.
ويفكرهم إنهم لو استغفروا ربنا جزاءهم هيبقي خير كبير جدا❤
لكن قوم نوح قالوله..
انت كلمتنا كتير واحنا خلاص مش هنؤمن بربنا..
انت بتألف الكلام ده من عندك. احنا مش هنسيب أبدا ود وسواع ويعوق ويغوث ونسرا... الآلهة بتوعنا..
فقالهم :
لو كنت بكذب فهشيل ذنبي لكن انا الحمدالله مش شايل ذنوبكم الكبيرة من عبادتكم غير ربنا.
أم يقولون افْتَرَاهُ ۖ قُلْ إِنِ افْتَرَيْتُهُ فَعَلَيَّ إِجْرَامِي وَأَنَا بَرِيءٌ مِّمَّا تُجْرِمُونَ"
قوم نوح بقوا لما سيدنا نوح يكلمهم يسدوا ودنهم ويحطو هدومهم علي وشهم..
"وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أَصَابِعَهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا"
وقالوا لسيدنا نوح...
انت اتكلمت معانا كتير يلا هات العذاب اللي بتقول انه هييجى للي مش هيؤمن.. هاته لو انت صادق..
قَالُوا يَا نُوحُ قَدْ جَادَلْتَنَا فَأَكْثَرْتَ جِدَالَنَا فَأْتِنَا بِمَا تَعِدُنَا إِن كُنتَ مِنَ الصَّادِقِينَ"
سيدنا نوح قالهم:
مش انا اللي أقدر اجيبه لكن ربنا اللي يقدر وماتفتكروش نفسكم ساعتها هتكونوا اقويا ..
وانا مهما انصحكم نصيحتي مش هيكون لها فايدة مادمتم مش عايزينها وربنا اعلم بقلوبكم اذا كانت تستاهل الهداية والخير ولا تستاهل الضلال والعذاب..
"
قَالَ إِنَّمَا يَأْتِيكُم بِهِ اللَّهُ إِن شَاءَ وَمَا أَنتُم بِمُعْجِزِينَ".
"وَلَا يَنفَعُكُمْ نُصْحِي إِنْ أَرَدتُّ أَنْ أَنصَحَ لَكُمْ إِن كَانَ اللَّهُ يُرِيدُ أَن يُغْوِيَكُمْ ۚ هُوَ رَبُّكُمْ وَإِلَيْهِ تُرْجَعُونَ"
الأغنياء والاقوياء اللي عندهم قوة وفلوس واولاد اقنعوا بعض انهم عندهم كل الخير..
عندهم ولاد وفلوس وكل حاجة بيتمنوها في الدنيا فقالوا لنفسهم اكيد احنا كدة الصح..
احنا مش هنغير افكارنا ومش هنسيب ودا ولا سواع ولا يغوث ويعوق ونسرا دول الآلهة بتاعتنا..
قوم نوح بقوا يتريقوا علي سيدنا نوح وعلي المؤمنين.
ونوح واصحابه المؤمنين صابرين... وبيدعو ربنا..
"قَالَ نُوحٌ رَّبِّ إِنَّهُمْ عَصَوْنِي وَاتَّبَعُوا مَن لَّمْ يَزِدْهُ مَالُهُ وَوَلَدُهُ إِلَّا خَسارا
.......
950 سنة بيحذرهم وهما يبصوا لنفسهم يلاقوا قوتهم وفلوسهم واولادههم فيتكبروا ويقولوا احنا الصح.. مافيش ربنا لو عندك عقاب يا نوح يلا هاته...
ربنا عرف سيدنا نوح ان مافيش حد تاني هيبقي مؤمن غير اللي آمن خلاص ..
سيدنا نوح فضل يدعي ربنا يدعي علي الكفار المتكبرين..
وَقَالَ نُوحٌ رَبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا (26)
إِنَّكَ إِنْ تَذَرْهُمْ يُضِلُّوا عِبَادَكَ وَلَا يَلِدُوا إِلَّا فَاجِرًا كَفَّارًا (27)
رَبِّ اغْفِرْ لِي وَلِوَالِدَيَّ وَلِمَنْ دَخَلَ بَيْتِيَ مُؤْمِنًا وَلِلْمُؤْمِنِينَ وَالْمُؤْمِنَاتِ وَلَا تَزِدِ الظَّالِمِينَ إِلَّا تَبَارًا (28)
بس يا تري ايه اللي هيحصل لما يدعي عليهم ؟؟