قصص الانبياء للاطفال .. قصة سيدنا أدم - الجزء الثاني

قصة سيدنا ءادم الجزء الثاني (٢)

كان يا ما كان وما يحلى الكلام الا بذكر النبي؟

عليه الصلاة والسلام

هو أية اللي حصل لسيدنا آدم وستنا حواء ؟

سيدنا آدم عليه السلام نزل الأرض مع حواء..

الارض غير الجنة خالص ،،

في الأرض آدم هيسعي ويشتغل وهتبقي الحياة فيها تعب..  بس مين نزل معاهم 

نزل معاهم إبليس ،، العدو اللي بقي واضح ليهم.

حواء كانت بتولد كتيييير

وكل مرة تولد فيها توأم ولد وبنت..

وخلفت ولاد وبنات كتير...

فكل مرة حواء تولد فيها ولد ومعاه بنت في بطن واحدة .. وبعدين ولد وبنت تانيين في بطن واحدة !! وفضلت كل ما تولد ،، تولد ولد وبنت في بطن واحدة..

سيدنا آدم كان بيعلم اولاده تعاليم ربنا وأوامره وبيحذرهم من الشيطان..

بس طبعا مكنش فيه حد علي الأرض غير سيدنا آدم وحواء وأولادهم

طب دلوقتي آدم وحواء عندهم أولاد وبنات كتير هيتجوزوا ميييين بقي 

وقتها ربنا امر ان كل ولد هيتزوج من البنت اللي اتولدت مع الولد التاني ،، والبنت التانية تتجوز الولد الاولاني..

يعني ماينفعش توأم يتجوزوا.بعض

و ازاي هيتجوزوا بعض وهما أخوات

ده كان دينهم وقتها وامر ربنا ليهم ساعتها... لأن مفيش غيرهم علي الارض.

مكنش فيه حد ربنا خلقه خالص غيرهم ،،

إنما دلوقتي مينفعش وربنا قالنا أن حرام أخ وأخت يتجوزوا 

قابيل..

دة كان الاخ الاكبر  واتولدت معاه بنت جميلة.

 هابيل ..

دة كان الاصغر واتولد معاه بنت اقل جمالا..  هي كانت جميلة برضو لكن التانيه كانت اجمل منها

 فالمفروص كدة هابيل يتجوز مييييين 

يتجوز البنت الاجمل ،، اللي هي توأم قابيل..

لكن قابيل مارضيش.!!! وقال انا هتزوج البنت اللي اتولدت معايا..

انا هاخد الأجمل.

 مع ان المفروض اللي يتزوحها هابيل. مش قابيل

فراحوا لسيدنا آدم عشان يحكم بينهم.فقالهم..

يقربوا قربان لربنا.

يعني أية ؟؟

يقدم قربان يعني يقدم حاجة يتقرب بيها لربنا ،، واللي ربنا هيتقبل منه هو اللي هيتزوج البنت توأم قابيل.!

هابيل كان بيعمل في رعي الحيوانات وعنده خرفان كتير.. هابيل فضل يشوف مين أحسن خروف عنده ،، لقي خروف سمين وتخين وقوي.

فقال لنفسه ده هيكون القربان اللي هقدمه لربنا ده أحسن حاجة عندي ..

وقابيل كان بيشتغل في الزراعة..

وفضل يدور إيه الحاجات إللي هوه مش محتاجها،، اللي متلزموش ومش عاوزها..

فأخد أسوأ حاجات مزروعه عنده وقال في نفسه هو ده اللي هقدمه..

راح هابيل وقابيل وكل واحد معاه القربان بتاعه وكل واحد حط القربان بتاعه..

طب هيعرفوا إزاي ان ربنا تقبل منهم؟

ان هتنزل نار تاكل القربان ،، وده هيبقي علامة ان ربنا تقبل القربان ده..

هابيل حط القربان بتاعه فأخدته النار..

وقابيل حط القربان بتاعه فربنا ماتقبلش منه.

وليه ربنا متقبلش من الاتنين؟؟ وتقبل من هابيل بس 

ربنا تقبل من اللي قدم احسن حاجة عنده ،، اللي قلبه خاف ربنا واختار احسن حاجة يقدمها لربنا

وهابيل دور علي احسن حاجه عنده يقدمها لربنا أنما قابيل أختار اللي مش عايزه عشان يديه لربنا

هو لو حد جالك وقالك انا جعان وعاوزين نأكله عشان نرضي ربنا نحطله بواقي الاكل ؟ ولا احسن أكل ؟

" احسن آكل طبعا "

طب لو حد غلبان وعاوزين نديله هدوم ،، نديله هدومنا المقطوعة القديمة؟ ولا نديله هدوم جميلة؟

" نديله الجميلة طبعا "

اول لما قابيل شاف ان ربنا مقبلش قربانه..اتغاظ.وقلبه اتملي حقد وحسد لأخوه.

وقاله: أنا هقتلك!

فرد هابيل عليه :

" قَالَ إِنَّمَا يَتَقَبَّلُ اللَّهُ مِنَ الْمُتَّقِينَ"

يعني انت متغاظ وهتقتلني ليه ؟

 ربنا عارف قلب كل واحد وبيتقبل من اللي بيخافه وعاوز يرضيه..

لكن قابيل كان الحسد والحقد ملا قلبه ومش عاوز يسمع أي كلام ولا نصيحه ولا عاوز كمان يصلح اللي عمله..

كل اللي بيفكر فيه انه يقتل هابيل ..

لكن هابيل رد وقاله :

"لَئِن بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ ۖ إِنِّي أَخَافُ اللَّهَ رَبَّ الْعَالَمِينَ"

 يعني لو انت حاولت تقتلني انا مش هحاول اقتلك لاني بخاف من غضب ربنا .

هابيل مكنش ضعيف ..

هابيل كان جسمه قوي ويقدر يقتل قابيل

 بس قاله انه بيخاف ربنا ومش هيعمل حاجة يغضب بيها ربنا..

هابيل كأنه بيقوله انت كمان يا قابيل لازم تخاف من ربنا قبل ماتفكر تؤذيني..

قابيل نفسه اتملت غل لأخوه ومش بيفكر غير في قتل هابيل اخوه وبس

فهابيل فضل يفكر أخوه بعذاب ربنا قاله  :

انه هيشيل ذنب علي ذنبه وهيبقي مصيره النار لو فكر يؤذيه ومفكرش يخاف من غضب ربنا ...

لكن قابيل لسه مصمم على قتل هابيل،، وفضل شايل في قلبه أوي من هابيل !!

واتجوز هابيل البنت الجميله ،، وقابيل البنت الاقل شوية صغيرين جمالا ..

قابيل فضل يكبر في قلبه الحقد علي اخوه لغاية لما الحقد ملا نفسه كلها. واتملت نفسه اكتر بفكرة قتل اخوه

لغاية ما في يوم من الأيام كان هابيل نايم ..

  فقابيل جاب صخرة وراح عند أخوه  وضرب راسه بالصخرة... وقتله.. ومات

قابيل افتكر انه لما يقتل اخوه هيروح الغيظ اللي في قلبه.. لكن بقي هو اللي خسران..

هابيل مقتول... وقابيل قاعد جنبه مش عارف يعمل ايه.... اول مرة حد يموت علي الارض..!

ماينفعش يسيبه كده... بس مش عارف يعمل أية !!؟..

فربنا بعت غراب بيحفر في الارض

لية

 عشان يوريله ازاي يدفن اخوه..

 قابيل شاف الغراب بيدفن غراب تاني..

فقابيل حس بالندم. انه حتي مش عارف يعمل زي الغراب.مش عارف يداري جسم اخوه اللي قتله.  وحس بالندم وانه عقله أقل من الغراب.

 قابيل حفر زي الغراب ما علمه ودفن اخوه 

 قابيل ساب نفسه لحسدها وغيظها  من غير  ما يصلحها... فكبر الغيظ في قلبه أوي وبقي سهل عليه اوي القتل..

قابيل كان فاكر انه بعد ما يقتل أخوه هيفرح عشان أنتصر عليه .!

لكن بعد ما عمل اللي هو عاوزه محسش لا بانتصار ولا فرحة.. ما بقاش عنده غير إحساس الندم والحسرة والخسارة .